Մարզային օրագիր. Ձեռնարկատիրական կրթության տարրեր տարրական դպրոցում

2018-02-07

ՀՀ կրթության և գիտության նախարար Լևոն Մկրտչյանը Կոտայքի մարզ այցի ընթացքում Արգելի միջնակարգ դպրոցում ներկա է գտնվել ձեռնարկատիրական կրթության տարրերի ներդրմամբ «Տեխնոլոգիա» առարկայի դասին: Նախարարը ծանոթացել է կրթական ծրագրի մանրամասներին, զրուցել ուսուցիչների և աշակերտների հետ: 2-րդ դասարանի աշակերտները ներկայացրել են «Տեխնոլոգիա» առարկայի ժամին իրենց իսկ ձեռքերով պատրաստած աշխատանքները, որոնց մի մասի համար կազմակերպված ցուցահանդես-վաճառքի հասույթով ձեռք են բերել վերոնշյալ առարկայի համար անհրաժեշտ գրենական պիտույքներ: «Ձեռնարկատիրական կրթության տարրեր ներդրված են ավագ դպրոցում, սակայն վերջին մեկ տարվա ընթացքում նմանատիպ ծրագիր ենք մշակել և ներդրել նաև տարրական դպրոցում: Երբեմն հարցադրումներ են հնչում, թե արդյոք տարիքային այս խմբի համար վաղ չէ՞ր ծրագրի ներդրումը: Այսօր ներկա գտնվելով «Տեխնոլոգիա» առարկայի դասին՝ պետք է իմ գոհունակությունը հայտնեմ ծրագրի ընթացքի վերաբերյալ, քանի որ դրա արդյունքում երեխաների մոտ ձևավորվել են լուրջ հմտություններ: Նրանք արդեն հասկանում են գումարի կարևորությունը՝ գիտակցելով, սակայն, որ այն նպատակ չէ, այ միջոց՝ ինչ-որ բան անելու: Բացի այդ, երեխաներն արդեն սկսել են ընկալել նաև բարեգործություն հասկացությունը»,-լրագրողների հետ զրույցում իր տպավորություններով է կիսվել նախարար Լևոն Մկրտչյանը՝  շնորհակալություն հայտնելով «Պատանեկան նվաճումներ» կազմակերպությանը և նրա ղեկավար Արմինե Հովհաննիսյանին՝ ձեռնարկատիրական կրթության ծրագրին աջակցելու և ուսուցիչների վերապատրաստում իրականացնելու համար:
Նշենք, որ հանրապետության 1247 դպրոցի մեկական 2-րդ և 3-րդ դասարաններում 2017 թվականի սեպտեմբերից ներդրվել է փորձնական ծրագիր՝ «Տեխնոլոգիա» առարկայի ուսուցում` ձեռնարկատիրական կրթության տարրերի ներառմամբ: ՀՀ կրթության և գիտության նախարարի հրամանով հաստատվել է առարկայի փորձնական ծրագիրը, որի շրջանակում վերապատրաստվել է 1247 դպրոցի 1356 ուսուցիչ: Փորձնական ծրագրում ընդգրկված է շուրջ 62900 սովորող:

 

Բաժանորդագրվել

Եթե ցանկանում եք պարբերաբար ծանոթանալ ՀՀ ԿԳ նախարարության կայքէջի «Տեղեկատվություն» բաժնի նյութերին, ապա կարող եք բաժանորդագրվել՝ նշելով Ձեր էլեկտրոնային փոստի հասցեն։ Այդ հասցեին կստանաք նամակ-հաղորդագրություն, որով կհաստատվի Ձեր բաժանորդագրումը։